مقدمة - دفاتري القديمة

انا و جوزي عشنا قصة حب طويله ... وشهيرة بين اصحابنا 

القصة دي بدأت بدري جدا جدا ...كنا صغيرين جدا .... أطفال ....

 الغريب انها استمرت سنين صعبة و طويله 

و هي السنين بتاعة المراهقة بكل التغيرات العقلية و الجسمانية و الفكرية اللي بتحصل في السن دا و اللي بتخلي نسبة استمرار قصة حب بين اي اثنين في السن دا ضئيلة لو مكانتش منعدمة 

أعترف ان انا و محمد كنا اشخاص غير عاديين في حبنا , يمكن دا اللي خلانا نتخطي مراحل صعبة و محورية في حياة كل واحد فينا و بتكون مليانة مشاكل من غير حاجة ما بالكم بقي قصة حب ... بكل تبعاتها العاطفية و الاجتماعية ...طبعا لكل قصة حب اعداء 

و  اعداء قصص الحب كلها نوعين بس 

النوع الاول اعداء و لكن من باب الخير : 

 زي مثلا الاب و الام اللي بياخدوا موقف عدائي لاي قصة حب مبكرة بتظهر في حياة احد ابنائهم و طبعا العداء بيكون ضد فكرة الحب نفسها مش ضد  الاشخاص ... لان بعاطفة الابوة و الامومة بيكونوا خايفيين جدا و عندهم مخزون من الخبرات و الحكم التي تؤكد ان الموضوع دا فاشل فاشل ... دا غير بقي السمعة و الاخلاق و كلام الناس .... و طبعا دائما ما بيكونوش عارفين تفاصيل العلاقة ايه .... لان دايما الموضوع بيقي سري ... زي ما بتحكي كل الافلام و المسلسلات

النوع الثاني بقي  أعداء من باب الشر :   

و دول بقي حتلاقي فيهم اصحاب غيرانين ...اشخاص اندال ... واحد او واحدة بيحط عينة علي احد الحبيبين و بيحاول ياخده و يفشكل العلاقة ...و هكذا 

المهم و الحمد لله تخطينا جميع الصعوبات و الاعداء ... و الاهم نجحنا أمام اختبار الزمن  فالقصة ابتدت في اوائل  صيف عام 1999

و مستمرة الي الان....

و ربنا وفقنا و اتخطبنا  فبراير  2007 

و اتجوزنا في ابريل  2009

و ربنا رزقنا بسما بنتنا الاولي في مارس 2010

و الحمد لله القافلة تسير و الذئاب تعوي ... هههههههههههههه

طبعا  كل حبيبين بيكون بينهم هدايا و جوابات و رسائل 

تحمل كل معاني الفرح و الشجن و الامل و المستقبل و الدموع و الافراح و اللقاء و الفراق و الصعوبات و المشاكل 

و هدايا عيد الحب و هدايا عيد الجواز و هدايا مرور السنة علي حبنا 

يعني كل قصة حب ليها أدبيات  و مؤلفات و قصص 

ايا كانت جودتها الادبية  فهي في الاخر بتعبر عن ارواح تلاقت و تحابت 

سأنشر لاول مرة هنا في مدونتي  أدبياتي مع حبيبي و الذي الان هو زوجي 

فاعتقد  انه لم يعد هناك سبب لاخفاء اي من هذه الاوراق عن اي احد الان 

و لا حتي عنه هو شخصيا ....

سأفتح دفاتري القديمة ...

سأفتح ما بداخلي .. و ما كان بداخلي 

تابعوني 

سلام

تابع القراءة »

تحضير عفاريت أفكاري

كل واحد فينا بيبدع عشان يركز اوقات المذاكرة و التركيز ...

انا كان ليا طريقة كدا ... عامله زي طرق المدمنين .... هههههههههههههههههههه

هي دي الروشته اللي انا دائما بستعملها لو عايزة اذاكر او ارسم او اقوم باي نشاط عقلي يحتاج هدوء نفسي و تركيز وهي تحضير عفاريت الابداع العقلي 

و اعتقد انها تصلح مع اي حد يبدع بالورقة و القلم او بالالوان او بالمذاكرة او اي نوع من المجهودات العقلية التي تحتاج الي تركيز و صفاء ذهني :

و دي بأه نصيحة من اختكم 

1- اول حاجة كدا اختيار غرفة في البيت تكون هادية و نظيفة عشان تكون قعدتك فيها مريحة و هادئة 

2- احضر الادوات اللازمة لما ستعملة سواء كانت مذاكرة او فن او اي شئ كما ذكرنا 

3- احضر راديو ... ايوه راديو ...ههههه و اظبطه علي اذاعة البرنامج الموسيقي لو كنت في مصر ... و هي اذاعة علي FM و ترددها 88.0 و لو كنت خارج مصر يمكن الاستماع لنفس الاذاعة لكن علي الريسيفر بتاع الدش و اسمها music programme 

اوكي ... و خلي الصوت هادي ... حلو كدا 

4- كدا بقي نوصل لمرحلة مخدرات الابداع  ..... ههههههههههههههههههه لأ لأ لا متفهموش غلط بس الحاجات اللي حقولكم عليها دي 

انا كنت عايشة عليها طول فترة الثانوية العامة و بعدها في كليه الطب ..و هي بتساعد علي التركيز و صفاء الذهن و دا طبعا بالنسبة لي 

 و هي .... 

واحدة كانز بيبسي او كولا بس ما يكونش دايت + واحدة شيكولاته جالاكسي او كادبوري او اي شوكلاته + واحد كوب نسكافية باللبن دافي 

طبعا الحاجات اللي بقول عليها دي فيها نسبة من الكافيين الطبيعي و السكر اللي بتعطي للمخ نشاط و تركيز جامد جدا و بتخلي الذهن صافي جدا 

و بتخلي الواحد يحفظ و يقرا و يبدع زي الصاروخ ....

نيجي بقي للمهم ...

حاول ان تجعل اعصابك هادية جدا 

بعد كدا ادخل الغرفة النضيفة الرايقة اللي شغال فيها موسيقي هادية و مفيهاش الا مخدرات الابداع و ادواتك 

و اقفل علي نفسك الباب و اقعد بأه مزمز في العمل الي بتقوم به بتركيز و مزمز معاه كل شويه حته شوكلاته او شوية بيببسي او شوية نسكافيه 

خلاص 

و متتطلعش برة الاوضه او تدخل حد معاك 

حتحس بصفاء نفسي اكثر من رائع و حتلاقي المذاكرة او النشاط اللي بتعمله ممتع ... و اتحدي 

و دي خلاصة تجربتي مع 3 سنين ثانوي و 7 سنين كليه طب قضيتهم بتفوق و الحمد لله

و هي دي ببساطة طريقة تحضير عفاريت الابداع  

و عشان تكونوا عارفين عفاريت الابداع في خدمة اي حد يستطيع ان يستدعيها بالطريقة الصحيحة 

 نيا هاهاهاهاها

يا ريت اعرف رأيكم ايه ؟؟؟؟

و يا ريت كمان اعرف طرقكم الخاصة في تحضير عفاريت الابداع 

تابع القراءة »

مأثورات ... غير مألوفه ....خنيقة

مأثورات : يعني اقوال مأثورة .... يعني حكم 

غير مألوفه: لان غالبا اي حد حيقرا التدوينه دي مش حيكون سمع الكلام دا قبل كدا 

خنيقة : يعني مخنقة  او خنقه او تزهق يعني شوف المعني اللي يريحك

(وجب التنويه عن معني العنوان لاسباب في نفس يعقوب )

1- ..... لازم تقبلي الــ لأ زي ما بتقبلي الــ أه

دائما ما تقال لي عندما لا يكون هناك مبرر او معني منطقي واضح للاجابه علي طلب من طلباتي بلا   ... فهنا يظهر صاحب القول المأثور ان العيب مش فيه عشان بيقول لأه لكن العيب فيا انا عشان مش قابله ال لأه.....

2- حــــااااااا  بتسوق كل الحمير  !!!!

اما دي بقي روعة بصراحة لم تقال لي ... هههههه لكنها من الاقوال المأثورة التي تستخدم من الاهل لاحداث نوع من البلبله الفكرية للابناء عندما يرغب احد الابناء بفعل شئ جماعي او الذهاب مع الاصحاب مثلا في خروجه او مع الجيران في مشوار و عندما تظهر الاجابه بلا من الابوين  ...و يأتي الرد البديهي من الابن اشمعنى انا ما كل اصحابي رايحيين ... و هنا يظهر القول المأثور  ليصدم الابن و يعود به الي صخرة الواقع الاليم .... بانه لو عمل هذا الشئ الجماعي  سيكون حمارا .... و يستجيب لهذه الحااااااااااااا  الخارجية

3- الزخمة

اكيد طبعا فاكرينني غلطت في الكلمة و اقصد الزحمة .... لا لا لا 

هي الزخمة صح .... بضم الزين و سكون الخاء....(الزوخمة) هههههههه

و هي آله تستخدم في ضرب الابناء .... بصراحة عمري ما شفتها ... لكن دائما ما كنت اتلقي التهديد تلو الاخر بانني لو ما سمعتش الكلام كدا و بقيت كويسة حتضرب بالزخمة ...

و سميت الزخمة   لما تحدثه من الزخم و النخم اثناء ضرب الضحية 

هما دول اللي في بالي دلوقتي  بس لسه فيه كثير .... لما افتكرهم حكتبهم

تابع القراءة »

اجزاء عن ...أنــــــا

.... لا يهم من انا ... لكن الاهم بماذا افكر ... و ماذا افعل.... فالانسان مواقف و اختيارات

... فانا انسانة بسيطة.... مهما ذكر لك الاخرون عما يميزني عمن هم حولي  ...فلا ابالي 
.... فلا ازال اري نفسي بسيطة

 ....لست مغرورة و لكني اعرف قدر نفسي 

لا يهمني ان الانطباع الذي يترك في مخيله من يتعرف للوهلة الاولي علي بأنني طبيبة جميلة من عائلة  ... او غيرها من الصفات التي  يتباهي بها الناس يمينا و شمالا ... لكن الانطباع الذي احب ان اتأكد اني اتركه في نفس كل من يقابلني هو اني جادة و  متواضعة 
و حبوبة و حقانية

السبب الاساسي الذي دفعني الي انشاء هذه المدونه هو رغبتي في تسجيل احداث كثيرة ..اخاف ان تطويها دفاتر النسيان ...ويعلوها التراب

 ...  اريد ان اوضح موقفي من اشخاص و افعال و احداث  مرت بحياتي

... انا متأكده انني لن ازيد او انقص علي الواقع شئ

...اعتبروني همسة في السكون ... او نقطة ماء سقطت في بحر واسع ...او ومضة ضوء اختفت في وسط الليل المظلم 


تأثير طفيف لكنه موجود.. .

.....سلام

تابع القراءة »